Күптән түгел Биклән урта гомумбелем бирү мәктәбендә «Туган тел һәм китап» атналыгы үтте. Йомгаклау көнендә V-ХI сыйныф укучылары катнашында "Туган тел” кичәсе уздырылды. Кичәнең максаты – туган телне саклау, китапка мәхәббәт тәрбияләү.
Бәйрәм залын алдан ук туган тел турында чыгарылган газеталар, яңа китаплардан төзелгән стендлар белән бизәдек.
Кичәгә кунак итеп үзебезнең мәктәпне тәмамлаган, Яр Чаллының "Ләйсән” әдәби-иҗат берләшмәсе әгъзасы, авылыбыз шагыйрәсе Рәзинә ханым Сәетгәрәева чакырылды.
Ул IV сыйныф укучылары (сыйныф җитәкчесе – Роза Сәетгәрәева) катнашында әзерләнгән әдәби-музыкаль монтаж белән башланып китте. Укучылар: Алсу Дәүлиева, Булат Мостафин, Диләрә Мәүләветдинова, Гөлназ Нуриева һәм Гүзәл Нәгыймуллина матур, сәнгатьле итеп туган телгә багышланган шигырьләр сөйләделәр.
Авылыбыз шагыйрәсе белән кызыклы әңгәмә үтте. Ул чара катнашучылар игътибарына соңгы вакытта иҗат иткән шигырьләрен укыды. Аннан соң укучыларга һәм укытучыларга үзенең шигырьләр җыентыгын бүләк итте.
Бәйрәм "Туган тел” җырын җырлап тәмамланды.
Мондый кичәләр балалар күңелендә туган телгә, әдәбиятка мәхәббәт тәрбияли, нәни күңелләрдә милли горурлык хисе уята.
"Якты юл" | 