Гәрәевалар икесе дә – профессиональ биючеләр. Альбина Биклән мәдәният йортына күптән түгел генә махсус хәзерлек алып кайтты. Әмма алар апасы Эльмира белән, кем әйтмешли, бишектән үк әниләре оештырган "Шатлык” халык бию ансамблендә биеп үстеләр, "Балкыш” фестивальләрендә җиңүләр яуладылар.
Татарстанның атказанган мәдәният хезмәткәре, "Шатлык” халык бию ансамбле җитәкчесе, Биклән мәдәният йорты директоры Розалия Гәрәева исә моннан нәкъ 30 ел элек мәдәният йортына яшь белгеч булып кайтты. Һәм шул еллар эчендә бөтен авылны биергә өйрәтте. "Шатлык”та ничә буын яшьләр биергә өйрәнеп үсте. Ансамбль төрле фестивальләр лауреаты, бәйгеләр дипломанты булды һәм, ниһаять, үзешчән бию сәнгате өлкәсендә ирешкән уңышлары өчен аңа "халык” исеме бирелде.
Районда үтә торган чараларның берсеннән дә читтә калмыйлар Биклән биючеләре. "Шатлык” – район Сабан туйлары бизәге, авыл яшьләренең үзенчәлекле тәрбия мәктәбе. Әле бүген дә анда өч төркем: нәниләр, урта яшьтәгеләр һәм балигъ булганнар төркемнәре эшли.
– Түгәрәккә йөреп үскән балалар аерылып тора: төз гәүдәле, матур атлап йөрергә, сынны дөрес тотарга өйрәтәбез. Олы сәхнәләргә менәрләр димим мин. Сәхнәгә чыккан бала күңеле начарлыкка тартылмый. Аннары, хәрәкәттә – бәрәкәт дип, өлкәннәр юкка гына әйтмәгән, – ди Розалия ханым.
Хәзер инде биюләрне яшь хореограф – Розалиянең кызы Альбина куя. Ул иҗатта үз юлын эзли. Элеккегеләрен кабатламаска тырыша, өйрәнә, үзе дә сюжетлы биюләр куя. Альбина, Алабугада хореография бүлеген тәмамлап, бию сәнгате серләрен өйрәнеп кайтты. Бөтен күңелен биреп эшли. Яшьләргә хас иҗат ялкыны белән алынды бу четерекле хезмәткә. Димәк, биючеләр династиясе дәвам итәчәк. "Шатлык”ка яңадан-яңа уңышлар алып килсен яшь талант иясе.
"Якты юл" | 